05 January 2012

Слухачы УЗВ адзначылі Калядна-Навагоднія святы


У нашым “Універсітэце Залатога Веку” ўмеюць не толькі добра вучыцца, але і добра адпачываць!

22 снежня адбылася Калядная вечарына, якая стала добрым завяршэннем першага паўгоддзя заняткаў гэтага акадэмічнага года і пачаткам святочных канікул.

На імпрэзу сабраліся больш за 50 навучэнцаў і навучэнак УЗВ. Шмат хто – у навагодніх касцюмах. У гэтым годзе на святкаванні былі і жывая елачка, і каралеўна, і цыганка. Хтосьці прыходзіў у прыгожых карнавальных масках. Святочная атмасфера разлілася ў паветры разам з буйствам колераў і шчырых усмешак.
 
Не абышлося, канешне ж, і без традыцыйных Святога Мікалая і Снягурачкі, якія не толькі развесялілі прысутных, але і падаравалі ўсім прыемныя падарункі. 
На гэты раз у навагоднім святочным дуэце з’явіўся памагаты – калядна-навагодні эльф Святога Мікалая. Ён дапамагаў Снягурцы і Св.Мікалаю зачытваць пажаданні і раздаваць падарункі.
Вельмі прыгожым і душэўным стаў выступ гуртка “Беларускія вячоркі”, якія ў цемры са свечкамі ў руках саспявалі меладычныя калядныя песні.
Пасля яны дапамагалі спяваць ужо вясёлыя калядкі наведвальніцам курсаў па польскай мове. Калядных песен на вечарыне гучала шмат, і самых розных!
На такую святочную вечарыну не маглі не завітаць калядоўшчыкі. Дзве групы – з казой і мядзведзем – яны паказалі новую праграму, насычаную жартамі, спевамі, касцюмамі. 

Тое, што калядоўшчыкі завіталі да слухачоў УЗВ, стане добрай прыкметай таго, што да кожнага з прысутных абавязкова ў новым годзе пагрукаецца шчасце і дабрабыт.
Канешне, з такой цікавай і насычанай праграмай, з такімі душэўнымі людзьмі, ніхто не хацеў разыходзіцца па хатах. Але ўсё добрае калісьці прыпыняецца, каб распачацца пасля. 

Шчыра віншуем усіх слухачоў Універсітэта Залатога Веку з Калядамі і Новым годам!

2 comments:

  1. Вельмі добрае свята!

    ReplyDelete
  2. Прыгожае, шчырае атрымалася свята ў нашым УЗВ. Як добра, што людьзі сталага ўзросту могуць, хай нават толькі на некалькі гадзін, станавіцца зноў маладымі, вясёлымі. Усім дабра!

    ReplyDelete